Showing results by author "Kumar Ravi" in All Categories

Prem asal mein kya hota hai, shayad yah prashn har insaan ke zehen mein zindagi ke kisi mod par zarur aata hai. College mein padhte ek ladka aur ladki, prem ke bandhan mein doobte ja rahe hain. Par aakhir yah kaisa bandhan hai, vah samajhne ki koshish kar rahe hain. Kabhi unhe yah ek khwab-sa lagta hai, toh kabhi sirf yahi ek jazba sachcha lagta hai. Dono prem ki iss leher ko alag nazariye se dekh rahe hain aur dono ke liye hi yah ehsaas bahut gehra hai. Ladke ne khud se yah kehna chaha ki ‘prem kuchh nahi hota’! Phir bhi vah ladki ke sparsh ke liye tadap raha hai. Ladke ko uss shaam ki yaad aa gayi jab dono hotel ki balcony mein haath thaame baithe the. Usne apni bhaavnayein shabdon mein vyakt karte hue kaha tha ki unginat khubsoorat chehron mein use na jaane kyun ladki ka hi chehra aisa laga jo uske hriday ko chhoo gaya. Usne yah bhi bayan kiya ki jab ladki uske saath nahi hoti toh use yah baat satati thi ki koi aur use chhoo na le. Ladki ne kaha ki jab dono juda hote hain toh use apni duniya bahut khaali lagti hai. Un lamhon ki udaseenta uske liye bardasht karna itna mushkil ho jaata hai ki vah sochti hai shayad ladke ko chhod dena hi behtar hai iss dukh ko jhelne se. Sparsh, shabd, chaahat, avsaad aur ek doosre ko khone ke darr ke beech, kya dono prem ka asli mayine samajh payenge?

Love is a blend of various feelings such as passion, extreme desire, immense happiness, deep sorrow. We experience these feelings at least once in our lifetime, and every time it rejuvenates you and makes you feel alive. Ishq ke kayi rang is an accumulation of three beautiful love stories, which are inspired by author's life. It will take you to an absolute and dynamic journey of love. 

Hum apne jeevan mein vibhinn prakar aur vibhinn prakriti ke logon se milte rehte hai, unse roobaroo hote rehte hai. Unmein se kuchh humse hamesha ke liye jud jaate hai, aur kuchh waqt ke saath kho jaate hai. Unhi mein se kuchh ka prabhav itna gehra hota hai ki wo duur hote hue bhi hamare dil ke kareeb hote hai aur kuchh aise bhi hote hai jinhe hum yaad karne ki cheshta tak nahi kar paate. Kayi baar kisi se chhoti mulaqat bhi yaadgaar ban jaati hai, to kayi baar saalon ki jaan pehchan bhi bas ek aupacharikta ban kar rah jaati hai. Ab tak ke jeevan kaal mein lekhak ki bhi kayi aise achchhe bure aur ajeebogareeb logon se mulakat hui thi, jo unki yaadon ke pannon mein shumaar hai. Is kahaani un dinon ki hai jab lekhak ke Hyderabad mein rehte hue kuchh maheene hi hue the. Nayi naukri aur naya shahar use raas aa raha tha. Lekhak jab bhi apne office ke kaam se free hota, apni girlfriend Aneeta ke saath ghoomta firta, shopping karta tha. Lekhak aur Aneeta us naye shahar ke vatavaran mein sukhad waqt guzar rahe the. Aneeta apne teen purane doston ke saath ek kiraye ke ghar mein rehti thi. Lekhak apne office ke doston ke saath Aneeta ke ghar se aadhe ghante ki doori par rehte the. Waise toh lekhak aur Aneeta hamesha milte rehte the par weekends mein unka waqt lagbhag saath mein hi guzarta tha. Waisi ek shaniwar ki shaam ko ghoomne firne ke baad lekhak aur Aneeta ghar laut rahe the, aur sadak mein unko ek panipoori-wala nazar aaya. Yah kahaani us mulaqat ke baare mein hai.

Registaan ke ek chhote kasbe mein sadhaaran jeevan vyateet kar rahi thi ek asadhaaran ladki. Shruti college mein padhti thi, chupchap, apni hi duniya mein gum rehti thi. Apni dhun mein magn iss ladki ke dimaag mein tezi se khayal daudte rehte the. Ek khayal filhaal uski gardan se chupak gaya tha—wahin jahan Vijay ne use chooma tha. Ekaant mein, apne khayalon ke saath, Shruti vah pal yaad karti hai toh kayi khwaab dekhne lagti hai. Vah dono padosi the, aur Vijay kaafi samay se Shruti ko aate-jaate dekhta tha. Shruti ke poochhne par ki vah kya dekh raha hai, Vijay ne bas muskura diya tha. Dono ne aankhon se baat karni shuru ki, phir lafzon mein phone par bhi baat hone lagi, aur dono roz milne lage. Shruti ke pitaji saal mein do baar ghar aate the, iss baar aaye toh dono ka milna-julna tham gaya. Pitaji aath mahine baad ghar aaye the, sarkari naukri thi, parivar ka khayal toh rakhte the lekin unse duur reh kar andar se bikhar rahe the. Shruti ki duniya mein filhaal sirf prem ki aandhi chal rahi thi, use bas Vijay ka khayal tha. Jab uski ma 50 kilometre duur mama ke ghar jaati toh vah aur Vijay poora din saath guzaarte. Par Shruti ko ek darr bhi satata tha: ki kahin Vijay, aur unka yah anmol bandhan kahin kho na jaaye. Pitaji ne Shruti ki shaadi ke liye ladka chunn liya tha, kya Shruti aur Vijay ka rishta ek raaz ban kar reh jayega?

Agar aap yah kahe ki insaan, bhagwan aur shaitan ka hi ek mila-jula roop hota hai, to shayad vah galat nahi hoga kyunki har insaan ke andar ek bhagwan hota hai aur ek shaitan bhi. Achchhai hoti hai aur burai bhi, par yah hum par nirbhar karta hai hum kisa zyada pasand karte hai, aur hum kise apne vyaktitva mein shumar karna chahte hai. Hum yah khud nirdharit karte hai, par kayi baar yah paristhitivash bhi ho raha hota hai. Kabhi hum apni chhoti chhoti khushiyan qurban kar dete hai bhagwan ban-ne ke liye aur kabhi apni matlabi harkaton se hum shaitan ban jaate hai. Rozmarra ki zindagi mein hum yah khel roz khel rahe hote hai. Na to hum poori tarah bhagwan ban paate hai aur na poora shaitan. Aisi hi mishrit ehsaason ki ye ek kahaani hai abhinav ki, jo Himachal Pradesh ke ek shahar iktar mein paala badha tha. Madhyam varg se dheere dheere utthan ki ore jaate hue parivaar mein uski parvarish hoti rahi thi. Uske pitaji ki usi shahar mein kapde ki ek badi dukaan thi jise uske bhaiya aur uske pitaji milkar chalate the. Jaise jaise Abhinav bada hota gaya, family business bhi phalta-phoolta gaya. Par Abhinav ko ghar ke business mein na to koi ruchi thi aur na hi ghar-wale us par dabav daalte the. Bachpan se hi wo tez-tarrar tha, jabki wo dil se ek sanvedansheel vyakti tha. Abhinav ki bachpan se hi ek dost thi, jiska naam tha Sakshi. Yah kahaani Abhinav ki is chhoti aur saral zindagi ki hai.

Yah kahani, ret ke teelon se guzarti, Rajasthan ke ek chhote kasbe mein humein le jaati hai. Prem kahani bhi hai aur samaaj mein vibhinn biradariyon ke beech padi daraar par bhi prakash daalti hai. Jogiya biradari li ladki, Kamli, solah baras ki hai aur uske byaah ki baat chal rahi hai. Koi yah nahi jaanta ki vah Manganiyar biradri ke ladke, Munshira se dil laga chuki hai. Roz dopahar vah dono station tak saath chalte hain aur saath mein sunehre bhavishya ka sapna bun rahe hain. Munshira ek kalakaar hai—lokgeet gaata hai jo ki uski biradri ka khaas pesha hai. Munshira ko ek mauka milta hai vilayat jaane ka, sangeet ki mandali mein. Paris mein vah Rajasthan ke lokgeet prastut karta hai aur khoob shabaashi aur paise kamaata hai. Doosre desh ki auraton ko dekh kar usmein jigyasa uth-ti hai lekin vah Kamli ko hi yaad karta hai. Vapas gaon aakar vah Kamli ko tohfe deta hai aur ek shaam vah dono registaan mein milte hain. Duniya bhula kar, Munshira gaata hai aur Kamli naachne lagti hai. Yah baat biradari mein aag ki tarah phael jaati hai aur Jogiyon ka samooh panchayat bulaata hai. Munshira Manganiyar par ilzaam lagaya jaata hai ki usne Kamli ko barbaad kar diya. Kya dono biradariyaan unke sachche prem ko samajh kar yah rishta sweekar karengi? Kya Munshira apne sangeet se prem ka yah sachcha swar logon ke dil tak pahuncha sakega yah phir Kamli ki prem-kahani samaaj ki seemaon mein kahin dafan ho jayegi?

Apni zindagi ke kayi saare padav par hum chhote bade lakshya nirdharit karte hai, unhe haasil karne ki cheshta mein mehnat karte hai, ji jaan bhi laga dete hai. Hume behad khushi milti hai jab hum us lakshya ko haasil kar paate hai, par vifalta milne par nirasha bhi gherti hai. Inhi saare anubhavon se hamara vyaktitva viksit hota hai. Kuchh log aise bhi hote hai jo koshish karne se pehle hi haar maan lete hai aur kuchh apne liye kathin lakshya nirdharit karte hai, ki faisla bhale hi ho aage jaakar hota ho par kathor mehnat aur lagan ki unhe aatma santushti prapt hoti hai aur kabhi na kabhi unhe uska parinam bhi milta hai. Kuchh log aas paas ke logon se prabhavit hokar apne liye aisa lakshya tay karte hai aur uske peechhe daudte hai, jismein unki ruchi nahi hoti aur phir parinamswaroop unki zindagi bhatak si jaati hai. Kabhi jeevan mein aisa bhi daur aata hai jab hamare saamne koi lakshya nahi hota, koi khushi mehsoos nahi hoti, utsah ksheen pad jaata hai, tab hum bilkul haara hua mehsoos karte hai. Aisa aksar umr ki dhalaan par hota hai ya phir kisi khaas paristhiti mein, Ye kahaani Manohar ki hai jiske jeevan mein koi lakshya nahi tha. Us din hi usne chaudah saal ki saza kaat kar jel se bahar ki duniya mein kadam rakha tha. Use katl karne ke jurm mein yah saza mili thi. Gaon ke sarpanch ka beta uski behan ko chhedta tha aur uske saath zabardasti karne ki koshish karta tha. Par baat had se tab badh gayi jab sarpanch ke bete ne apne doston ke saath milkar uski behan ka rape karne ki koshish ki.

Sadak se guzarti ek bus mein ladki sheher chhod kar ja rahi thi. Ek shaam pehle usne ladke se poochha tha ki kuchh logon ke bichhadne se dukh kyun hota hai. Ladke ne kuchh soch kar apna ek sawal saamne rakha tha: kayi baar zindagi aise logon ke saath hi kyun bita dete hain jinke saath hone se bhi koi khushi nahi hoti. Inn sawalon mein kahin unki bhaavnayein bhi chhupi huyi thi. Dono ko ek doosre ke astitva ka gehra ehsaas hai, aakarshan hai, shayad prem bhi hai. Ladka shaam hone ka intezar karta hai jab unki mulaqat hogi, ladki sochti hai ki vah ladke se pyar karti hai lekin bayan kaise kiya jaaye. Saath guzaare lamhon mein vah dono ek doosre ko apne hriday ki baatein bataate hain, haath thaamte hain, kabhi rooth-te hain toh kabhi manaate hain. Coffee House mein saath baithe vah vaada karte hain ki ek doosre ka saath nahin chhodenge. Unhone apni ek alag duniya bana li thi jahan se bahar ki duniya ka shor unn tak nahin pohonchta tha. Kaunsi duniya vaastavik hai, shayad vah bhoolte ja rahe the. Phone par vah kabhi bahut saari baatein kar jaate toh kabhi bas ek doosre ki khamoshiyon mein gum rehte. Ek din unhe zindagi ne jhinjhor kar ek vikalp chun-ne ka mauka diya. Aisa kya haadsa hua ki vah saath reh kar saari sambhaavnaayein samaapt kar sakte hain ya phir juda ho kar naye jeevan ki roshni dhoond sakte hain? Kya unka saath smritiyon aur sapnon ke liye hi tha?

Zindagi ek lambi kahaani hai jo chalti jaati hai. Ismein kayi saari khushiyon aur gham ki dastan bharti rehti hai. In khatti-meethi kahaaniyon ke daur mein kayi baar aise mod aate hai jahan se zindagi ka rookh badal jaata hai, hamari soch badal jaati hai, hamara nazariya badal jaata hai. Par girte-sambhalte, bhoolte-seekhte, haste-rote hum aage badhte rehte hai aur kahaaniyon ka silsila chalta rehta hai. Mazedar baat yah hai ki hans kisi ke jeevan ki chhoti aur badi kahaani, kisi bhi doosri kahaani se alag aur manoranjak hoti hai. Yah kahaani Harshit ki hai, jo ek dhani aur samriddh parivaar mein paala badha tha. Uske pitaji Mumbai mein ek bade corporate company ke CEO the aur uski maa Mumbai mein hi ek TV channel mein editor thi. Unke beech shuruaati kuchh saalon tak pyaar bana raha aur phir dono apne apne ego ka shikaar hokar ladte rahe. Jiski wajah se Harshit ko kabhi maa baap ka pyaar dhang se nahi mila. Uske paas Harshit ke liye waqt hi nahi tha. Apne-apne kaam aur usse judi duniya mein dono itne vyasth the ki kayi baar unko yah bhi dhyan nahi aata tha ki Harshit ka khayal rakhne ki zimmedari bhi unki hi thi. Dheere dheere Harshit ko bhi isi tarah jeene ki aadat ho gayi, usne shikayat karna chhod diya. Ek hi ghar mein rehte hue bhi unke beech dooriyan badhti chali gayi. In sab ke peechhe ek bahut bada kaaran Rama aunty bhi thi, jisne Harshit ka bachpan se khayal rakha tha.

Ma ka dil, jismein apne parivaar ke liye prem aur chinta rehti hai, wahi dil kamzor ho chala tha. Dil ki takleef hone par unhe hospital mein bharti kiya gaya. Udhar Raman aur Kanika ke beech baat ek kadam aage badhti toh do kadam peechhe. Dono ke rishte mein kahin koi kami thi jo vah khud bhi nahin samajh pa rahe the. Virodh aur sandeh ke beech unki baat ek doosre tak pohonch hi nahin paati thi. Raman ko shak tha ki Kanika ko kisi aur se pyar hone laga hai, lekin Kanika ka kehna tha ki vah aadmi sirf ek dost hai. Ek baar yun hi sadak par Raman ki mulaqat ek sundar ladki se huyi thi jo uske school mein thi. Vah ladki kuchh zyada nahi kehti lekin Raman iss baat ko ek dilchasp kahani banakar daftar mein batata hai. Vah utsuk tha ki shayad uske jeevan mein kuchh khaas hone-wala hai, vah ladki Kanika thi. Uss pehli mulaqat ke baad jald hi dono coffee ke liye mile the. Dheere-dheere SMS bhejne lage the aur phir kaafi kareeb aa gaye the. Par kya vah ek doosre ko samajh sake the? Ya rishta kaayam karni ki jaldbaazi mein ek doosre ki duniya pehchaan hi nahin paaye the? Ek taraf hospital mein badhti aashanka hai, doosri taraf rishton mein khinchti daraar. Iss beech kahani ke paatr apni hi duniya mein kho rahein hain, paas hokar bhi sachchayi se apni manosthiti nahin keh pa rahe. Kya vah phir se pehli-si nazdeekiyaan mehsoos kar payenge?

Sabki apni apni kahaani hoti hai. Achchhi ho ya buri, boring ho ya mazedar, sachchi ho ya jhoothi, jaisi bhi ho par kahaani hoti zaroor hai. Log ghanton tak baith kar baatein karte hai, aur ek doosre ko apni kahaaniyan sunate hai. Har kisi ko koi sunne-wala chahiye aur koi sunane-wala bhi, shayad use hi log humdard ya kareebi dost kehte hai. Par yah kahaani ab tak kisi ne nahi suni hai kyunki yah kahaani Bravo ki hai, aur Bravo ek kutta hai. Jahan se Bravo ko sab yaad hai, use ek madhyam vargeey parivaar mein bade shauk se laaya gaya tha, jahan paanch log rehte the. Uske malik ka naam Harishankar tha aur wo bahut pyaare insaan the, jinhone shuru se hi Bravo ko behad pyaar diya tha. Ghar mein unke alawa unki patni aur 2 bachche rehte the, Rinku aur Priya. Harishankar ke alawa Priya use pyaar karti thi, par Rinku use satane mein laga rehta tha. Rinku sirf paanch saal ka tha aur isliye use zyada samajh nahi thi. Wo kabhi Bravo ki poonchh kheenchta, to kabhi uske upar baith kar sawari karne ki koshish karta. Bravo ko din ke waqt neend bahut aati thi aur Rinku hamesha uski neend mein khalal daalta tha, use jagakar uske kaan kheenchta tha. Lekin Bravo bhi apne tareeke se badla le hi leta tha. Jab subah mein Rinku soya rehta, tab wo jaakar uska muh chaat leta, ya raat mein jaakar uske bagal mein so jaata tha. Lekin in sab cheezon ke beech mein bhi ek baat kabhi uska samajh mein nahi aata tha.

Garmi ke mausam mein terahveen maale ke flat se aasmaan ka ek tukda nazar aata tha. Daftar mein kaam karta ek yuvak apni aam zindagi ke baare mein soch raha hai. Use maloom hai ki boss uski koi galti nikaalne ki firaaq mein hai. Uski udaseenta dekh kar boss use canteen le kar jaata hai aur jaan-ne ki koshish karta hai ki uske mann mein kya hai. Vah saaf keh deta hai ki vah job nahi karna chaahta. Yuvak ki kuchh mahatvakankshaayein hain aur kayi sawal hain. Vah jaldi zindagi ki daud mein aage badhna chaahta hai, ghis-ghis kar salary kama kar nahi, balki bade business mein daav lagana chahta hai. Yah sach mein uska sapna tha ya phir sirf promotion paane ka ek zariya? Bachpan se use sikhaya gaya tha ki duniya ek khel hai, aur use jeetne ke liye ek chatur khiladi banna padega. Doosri taraf chal raha tha prem ka khel. Namita uske saath rehti thi, par uski cigarette peene ki aadat pasand nahi karti thi. Namita ko chitrakala se lagaav tha aur ek shaam vah deewar par latki ek painting ki gehraayi samjhaane ki koshish karti hai. Yuvak ko sirf ganit ki duniya samajh mein aati hai aur Namita kala ki baatein karti rehti hai. Unn dono ke beech jaise barf ki deewar khadi ho gayi. Kya vah ek doosre ki duniya ko samajh sakenge? Kya unke nazariye alag ho kar bhi pyar ki aanch mein ek saath pighal sakte hain ya phir unke raaste alag hain?

Kayi baar jab akelapan hamare jeevan se guzarta hai ya kuchh waqt ke liye thahra hota hai, tab hume hamara khud se vastavik parichay hota hai. Jab kal ki yaadein ghirti hai, tab hume hamare vyaktitva ki jhalak milti hai. Ghar mein pade yun hi jab hum deewarein niharte hai, tab waqt ke guzarne ka ehsaas hota hai. Jab jeevan mein khalipan pasarta hai, tab hum khud ko tatolte hai aur bhavishya ki parikalpna karte hai. Kayi baar hume akelapan achchha bhi lagta hai. Dheere dheere jab hume uski aadat padne lagti hai, tab kahin aana, jaana, safar karna, kisi ke kareeb aana ya kisi bhi tarah ka badlaav hame achchha nahi lagta hai. Amit aise hi akelepan ki galiyon se ek lambe arse se guzar raha tha. Use koi sudh nahi thi ki wo kab se is tarah akela safar kar raha tha. Uska na koi dost tha, na koi kareebi, aur na koi mukaam, jaise wo waqt ka bas ek raahi ban kar rah gaya tha. Subah bematlab hi time par uth jaana, kaam par chale jaana aur phir shaam ko ghar aakar unhi halaat mein waqt guzaar dena Amit ki roz ki aadat ban chuki thi. Karya sthal par bhi wo kisi se baat nahi karta tha. Chhuttiyon ke dinon mein wo ghar mein akela pada rehta, TV par kuchh bhi dekh leta ya thodi der bahar tahal aata. Par wo kuchh bhi kar raha ho, dimagi taur se purani yadon mein hi safar karta. Un yaadon mein jeena use sukoon deta tha, kyunki uska ateet bahut hi alag tha.

Shaam dhalne ki taak mein tha jab sarpat daudti hui train mein log apni-apni jagah par baithe hue khidki se bahar ka nazara dekh rahe the. Hawayein andar baithe yatriyon ko berehmi se jhakjhorte hue is paar se us paar bahti chali ja rahi thi. Khidki se bahar duur-duur tak hare bhare khet aur un kheton mein kisan nazar aa rahe the. Pighalte hue asmani rang par shaam ka andhera chha raha tha, jab chidiyon ka jhund hadbadate hue apne basere mein laut rahe the jaise, maano andhera unke liye koi abhishap ho aur vo teevra gati se udte hue apne ghoslon mein pohonchkar chhip jaana chahte ho. Door se dekhne par yah poora drishya kisi mashhoor photographer ya painter ki ek sundar kriti ka ehsaas kara raha tha. Lekhak ko prakritik vatavaran evam kalakritiyon se lagav tha aur yah sab dekhkar vah anandvibhor ho raha tha, lekin uska avchetan mann alag hi khayalon mein khoya hua tha. Ateet aur bhavishya ki kayi sari batein hawaon ki tarah mastishk mein aa-ja rahi thi. Bagal ki seat par baithe ek buzurg ke ek sawaal ne uska dhyan kheeencha. Safed kurta pehne us buzurg ke chehre par masoomiyat, aur awaaz mein thahrav tha jaise bahut kuchh dekha ho apni zindagi mein aur kaafi tajurba bhi liya ho. Shayad unhe hamari tarah ab kisi bhaag daud ka hissa nahi ban-na tha. Wahan baithe sabhi log apne-apne dhun mein lage the aur vah sawaal achanak se lekhak ko asli duniya mein wapas le aaya.

कहानी सुनाने की कला को किस्सागोई कहते हैं।